BYD АҚШ билігін сотқа берді

BYD-дің АҚШ аумағынан орын тепкен төрт үлестес компаниясы осы елдің басшыларымен соттасуға бел байлады. BYD America LLC, BYD Coach & Bus LLC, BYD Energy LLC және BYD Motors LLC жолдаған арызда биліктің тарифі Халықаралық төтенше экономикалық өкілеттіктер туралы заңға (IEEPA) сәйкес келмейді деп жазылған. Жауапкер ретінде федералдық үкіметпен қатар Ішкі қауіпсіздік министрлігі, Кеден және Шекара қызметі, АҚШ-тың сауда өкілдігі кеңсесі мен Қаржы министрлігіндегі лауазымды тұлғалардың аты аталады.

Арызданушы тарап тізімге енген бірнеше ведомство лауазымын асыра пайдаланып отырғанына сенімді және 2025 жылғы ақпаннан бері қабылданған тоғыз қаулыға наразы. Оның ішінде Мексика мен Канада шекарасындағы салықтар, Қытайға қарсы бағытталған алым және фентанил контрабандасымен байланысты шаралар бар деп жазды Carscoops.

Автоөндіруші мұндай шараларға тыйым салынғанын қалайды және өзі төлеген IEEPA тарифтерін, пайыздарды қайтарып, сот шығындарын өтеуді талап етеді.

Брендтің мұндай қадамға баруына АҚШ-та жеңіл модельдерін еркін сатып, саудасын қыздыру ниеті себеп болғаны анық, қазір ондай мүмкіндік жоқтың қасы. Калифорниядағы 10 жылдан бері автобус шығарып жатқан зауытының да жағдайын жақсартқысы келеді.