Ресейде Citroen C5 Aircross-тың сериялы өндірісі басталды

Бұған дейін Citroen, Peugeot және Mitsubishi көліктерін құрастырған Калугадағы «ПСМА Рус» зауыты қайта жұмыс бастады. Кәсіпорынның қазіргі операторы «Автомобильные технологии» фирмасы жаңарған Citroen C5 Aircross кроссоверін құрастырады, олар автомобильді Ресейде сатуды жоспарлап отыр.

Машина жалғыз комплектацияда шығады, бағасы — 4.3 млн рубль (21 млн теңге).

Зауыт модельді шағын торапты әдіспен құрастырады. Кәсіпорынға дайын күйінде келетін ең үлкен деталь — дәнекерленіп, боялған шанақ, қалғаны бөлшек күйінде жетеді. Компания шетелден келетін 1700 детальдан тұратын 800 өнім тобы туралы хабарлады, бірақ комплектіні нақты қайдан әкелетіні белгісіз. Бұл жобаға Citroen компаниясының тікелей қатысы жоқ деген ақпарат бар. Ұсыныс шығыстағы көрші елден түскен сияқты.

C5 Aircross өндірісі «джак» — «Москвич 5-ке» қарағанда едәуір толыққанды болады. Қазір модель локализациясы техникалық сұйықтық құю деңгейінде ғана. Бірақ зауыт жақында Ресейде шыққан аккумулятор мен шина орнатуды жоспарлап отыр. Калугада жасалған «эйркросс» ресейлік VIN-нөмірмен шығып жатыр.

Ресей нарығына арналған Citroen C5 Aircross 175 ат күшіне ие 1.6 литрлік бензинді турбомотормен жүреді. Ол 8 диапазонды автоматпен жұмыс істейді. Кроссоверге фирмалық Progressive Hydraulic Cushions гидравликалық аспасымен орнатқан. Жабдықтар тізімінде екі аймақты климат-бақылау, 10 және 12.3 дюймдік екі дисплейі бар медиажүйе, айнала шолу камерасы және парктроник бар, салон былғары және алькантарамен әрленген. Зауыт автомобильге 3 жыл немесе 100 мың шақырымға кепілдік береді.

Қытай тұрғындарына арналған Citroen C5 Aircross та осындай мотормен жүреді. Ол 147 700 юань (9 млн теңге) тұрады, ал жергілікті нарықта кроссовер 211 ат күшіне ие 1.8 литрлік қозғалтқышпен жабдықталады.

Ресейде кроссоверге сәуірден бастап тапсырыс беруге болады, машина дилерлерге бір айдан кейін жетеді. Зауыт нақты қанша машина шығаратыны қазірше белгісіз.