Renault мен Geely іштен жанатын қозғалтқыш пен гибрид күштік құрылым шығаратын ортақ кәсіпорын ашады. Басқа алпауыт автоөндірушілер жаппай электрге көшіп жатқанда француздар мен қытайлар жылына 5 миллион ІЖҚ шығармақ.
Жаңа кәсіпорын құрамына үш құрлықта орналасатын 17 зауыт кіреді. Одан бөлек мотор әзірлейтін бес ғылыми-техникалық орталық болады. Компанияда 19 мың адам еңбек етеді.
Онда жасалған қозғалтқыштар мен беріліс қораптары екі концерн шығаратын Renault, Dacia, Geely, Volvo, Lynk&Co секілді марка көліктеріне қойылады. Renault серіктестері Nissan мен Mitsubishi-ге де агрегат жеткізуге ниетті.
Стратегия бойынша 130 елге күштік құрылым жеткізілуі мүмкін, өйткені компания серіктестерімен ғана шектелуді қаламайды. Бірлескен кәсіпорын қызметін бәсекелес фирмаларға да ұсынады. Renault/Geely моторларын шығып жатқан көліктердің 80 %-ына орнатуға болады екен.
Қос бренд есебінше болашақта дәстүрлі қозғалтқышқа сұраныс артпаса, кемімейді. Олар Латын Америкасы, Оңтүстік Шығыс Азия және Оңтүстік Кореяға үміт артып отырған сияқты.
Кореяда Renault мен Geely-дің ортақ кәсіпорны бар. Ондағы мамандар гибрид кроссовер құрастырады. Жаңа компанияның алғашқы өнімі келер жылы шығады.
Комментариев: 0