Әлеуметтік желіде Алматыдағы Байтұрсынов пен Жамбыл қиылысында сенбі күні болған апат түсірілген видео жарияланды. Жеңіл машина мен жедел жәрдем соқтығысқан сәт бейнетіркеуішке жазылған.
Бейнежазбадан Hyundai H350-дің Байтұрсынов көшесімен солтүстік бағытта қозғалып бара жатқаны байқалады. Жамбыл қиылысына жақын маңда арнайы жарығы мен дабыл белгісі қосулы жедел жәрдем велосипед жолағына шығады да, бағдаршамның қызыл түсіне өтпек болады.
Дәл сол сәтте Ravon R4 Жамбыл көшесімен шығыс бағытта кетіп бара жатқан. Седан рөліндегі азамат арнайы көлікті байқамай қалып, фургонға соғылды. Sputnik.kz таратқан ақпаратқа сүйенсек, жүргізуші сиренаны естімепті. Абырой болғанда апаттан ауыр жарақат алған ешкім жоқ. Жедел жәрдемдегі науқасты басқа жасақ алып кетті, ал «равон» жүргізушісі дәрігерлер тексерген соң ауруханаға барудан бас тартқан.
Айта кетерлігі, арнайы көліктің дабыл белгісі қосулы болса да, жүргізуші жол ережесінің 6.1-тармағының талабын орындамаған. Ережеге сай ол өзіне басқалардың жол бергеніне көз жеткізген соң ғана басымдықты пайдалануы тиіс еді.
Комментариев: 0