«Қытайлық Камри» қанша тұрады? Chery Arrizo 8-дің бағасы белгілі болды

Қазақстандағы Chery топтамасы седанмен толықты. Arrizo 8 ұзындығы 4780 мм болатын D класты седан, оның өлшемі танымал Toyota Camry-мен шамалас.

2022 жылғы сәуірде жарық көрген модель Қазақстанда үш комплектацияда сатылады, бес түрлі шанақ түсінің бірін таңдауға болады, бірақ топтамада бір ғана мотор бар. Седан 186 ат күшіне (275 Нм) ие 1.6 литрлік турбомотормен жүреді. Агрегат 7 сатылы роботпен жұмыс істейді. Машина алдыңғы жетекті.

Ресми дилерлер базалық Arrizo 8-ді 13.8 млн теңгеге сатады. Мұндай автомобиль алдыңғы және бүйірлік қауіпсіздік жастығы, электронды көмекшілердің ауқымды жинағы, атап айтқанда: көрінбейтін аймақты бақылау, жолақта ұстау, автоматты тежеу, бейімді круиз-бақылау және айнала шолу камерасымен жабдықталған. Сондай-ақ седанда кілтсіз ашу, екі аймақты климат-бақылау жүйесі, сымсыз қуаттағыш, бейнетіркеуіш, жылытуға және желдетуге болатын орындық, жылытуға болатын рөл бар. Жүргізуші мен жолаушы орындығы электр көмегімен реттеледі. Цифрлы аспаптар панелі мен 12.3 дюймдік медиакешен экраны орнатылған.

Ал Luxury түрленімінде бұлардан бөлек панорамалы шатыр, артқы жолаушыларға жайлы бас тірегіш, 12 динамигі бар аудиожүйе, электронды көмекшілер жинағы және артқы бүйірлік қауіпсіздік жастығы бар. Бағасы — 14.5 млн теңге.

Ең қымбат Luxury DC комплектациясы 14.7 млн теңге тұрады. Ол төбесі қара екі түсті шанақ бояуы, ақ-көк түсті салон сияқты элементтермен ерекшеленеді.