Қытайлық эйрбэг АҚШ-та сегіз адамның өмірін қиды

2025 жылы қыркүйекте АҚШ-тың Жол қауіпсіздігі жөніндегі ұлттық басқармасы (NHTSA) ел аумағында сапасыз эйрбег анықталуына байланысты тексеру бастағанын хабарлады.

Мұндай қауіпсіздік жастығы ашылған кезде салонға металл сынықтары шашылып, үлкен қауіп төндіреді. Бұған дейін осындай жеті оқиға тіркеліп, бесеуі адам өлімімен аяқталған. NHTSA-ның ең жаңа дерегіне сүйенсек, қаза тапқандардың саны сегізге, ал оқыс оқиға саны онға жеткен. Қазірге дейін белгілі болған жағдайлардың бәрі Chevrolet Malibu мен Hyundai Sonata автомобильдеріне қатысты.

Ақауы бар қауіпсіздік жастығының инфляторын Қытайдың Detiannuo Automobile Safety System (DTN) компаниясы өндіріпті. Мұндай жабдықтар Америкаға заңсыз жолмен кіріп, шағын шеберханалар оны жол апатына түскен машинаны жөндеуге пайдаланған деген болжам бар. Компания ресми парақшасында АҚШ-та бизнес жүргізбейміз, ол елде сатылған кез келген өнім заңсыз деп мәлімдеген.

Мамандар жол апатынан кейін машинасын жөндеткен жүргізушілерге тез арада көлігін тексеруге кеңес берді. Эйрбэгтен DTN инфляторы анықталса, барлық компонентті толық ауыстыру қажет. Тергеуге NHTSA ғана емес, ФБР мен Ұлттық қауіпсіздік агенттігі де араласады.