Қытайлық эйрбэг АҚШ-та бес адамның өліміне себеп болды

АҚШ-тың NHTSA агенттігі өлімге әкелуі мүмкін эйрбэгке қатысты тергеу жұмысын бастады. Мамандар оның құрамында қауіпті химиялық зат бар деп күдіктенеді. Қауіпсіздік жастығы ашылған кезде онымен бірге инфлятор сынықтары салонға шашырайды.

Осыған дейін мұндай жағдай жеті мәрте тіркелген, оның бесеуі кісі қазасымен аяқталды. Соңғысы биыл шілдеде болған: Chevrolet Malibu мінген 22 жастағы қыз 48 км/сағ жылдамдықпен келе жатып апатқа түскен. Оқыс оқиға кезінде инфлятор сынықтары шашырап, мойнына тиіпті.

The Wall Street Journal хабарлағандай, қауіпті эйрбэгтерді Қытайдың Гирин провинциясындағы Detiannuo Safety Technology фирмасы (DTN Airbags) өндірген. Компания әлемдегі танымал брендтердің өніміне ұқсас жалған жастық шығарады деген күдік бар.

Мұндай контрафакт тауар АҚШ-қа импортталады, ал оны шағын шеберханалар бағасына қызығып сатып алады. Осы елдің көлік министрі Шон Даффи импорттаушылар мен механиктерге мұндай бөлшекті пайдалануға болмайтынын ескертті.

АҚШ-та қанша автомобильге DTN фирмасы жасаған эйрбэг орнатылғаны белгісіз.