Autoliv мотоцикл эйрбэгін патенттеді

Қауіпсіздік жастығы автомобильдің ажырамас бөлігіне айналғалы қашан, қазір кей модель алды-артындағы жастықпен ғана емес, жеке перде, тізе тұсындағы жастық, тіпті жолаушыларды бір-бірінен қорғайтын құралдармен жабдықталады.

Мұндай жүйені мотоцикл мен мопедке бейімдеу мәселесін инженерлер талай талқылағаны анық, алайда осы уақытқа дейін Honda Goldwing ғана эйрбэг алды. Дегенмен басқа брендтер қол қусырып отырған жоқ, жуырда Autoliv фирмасы жаңа өнімін патенттеді.

Cycle World порталы тауып алған құжатта бұл құрал іске қосылса, жүргізушіні орап алып, тек алдыңғы емес, бүйірден тиген соққыдан да қорғайды деп жазылған. Идея жүзеге аса ма, жоқ па, уақыт көрсетеді.

Кейінгі кезде райдерлер арасында мототехникаға кіріккен эйрбэгтен гөрі арнайы кеудеше ішіндегі құрылғылар танымал, технологияның өзі де көз ілеспес жылдамдықпен дамып келеді. Он жыл бұрын қауіпсіздік жастығын қосу үшін арқанжіпті тарту қажет болса, заманауи жүйелер көптеген сенсор көмегімен жұмыс істейді және сервистік қызметсіз-ақ бірнеше рет пайдаға жарайды.