Лондонда қымбат көлік мінгендер заңға бағынбай жүр

Парсы шығанағындағы елдердің ауқатты азаматтары жеке көліктерін Англия астанасына әкеліп, жазғы демалысын осында өткізуді әдетке айналдырған. Мұндай сапар арзанға түспейді, себебі темір тұлпарды әуе арқылы жеткізу 34 мың доллар тұрады. Бұл тек бір бағытқа кететін шығын.

Шейхтер машинасын такси тұрағы, жүк тиейтін аймақ немесе автобус жолағы сияқты жерлерге тастап кете береді. Найтсбридждің беделді ауданындағы Harrods әмбебап дүкені осындай автомобильдер жиналатын орынға айналды. Оның маңайында Ferrari, Lamborghini, Rolls-Royce және басқа қымбат машиналар қаптап тұрады.

Миллионерлердің жалпы шығынын ескерсек, тұрақ үшін 150–215 доллар айыппұл төлеу қиындық туғызбайтын сияқты деп жазды Carscoops. Қонақтар алдыңғы әйнектегі айыппұл түбіртегін елемейді. Қарсы емес, бірақ бірде-бір фунт төлемейді.

Мәселенің ауқымын мына дерек көрсетеді: Вестминстер ауданының өзінде 2018–2022 жылдар аралығында полиция Әмірліктен келген жүргізушілерге 13 423 айыппұл салған. Оның 1 пайызы ғана бюджетке түскен. Былтыр бұл көрсеткіш бойынша 2570 айыппұл арқалаған Қатар азаматтары антирекорд орнатты. Олар Ұлыбританияға әлдеқайда жақын Франция мен Германия азаматтарын артта қалдырды.

Тұрақ ережесін бұзу азаматтық-құқықтық жауапкершілік болғандықтан Лондон билігі суперкар иелерінен айыппұл өндіріп ала алмайды, ал қарызын төлемеген адамның мүлкін тәркілеуге полицияның құқығы жоқ.

Тағы бір кедергі — «бір айыппұл — бір ереже бұзу» қағидаты. Яғни әр айыппұл бойынша жеке азаматтық сот ісін жүргізу қажет. Ұлыбритания мен Парсы шығанағындағы елдердің арасында дерек алмасу жөнінде келісім жоқ. Сондықтан оларды сотқа шақыру қиын.

Ұлыбритания парламентінде 2009 жылы шыққан ресми қорытынды әлі өзекті. Онда «Шетелде тіркелген көлік құралы тұрақ және жол ережесін бұзса, қала орталығына кіру ақысын төлемесе жауапқа тартылмайды» деп жазылған.