Қытайда жаңа автомобиль бренді пайда болды

Ақпараттық алпауыт Baidu (Google-дың қытайлық аналогы) Ernie bot сервисі негізінде автономды жүргізу жүйесін дайындап, озық көліктер жобалау және өндіру жұмыстарына кіріскен. Бірақ автоөндірісте тәжірибесі болмағандықтан, Geely-дің көмегіне жүгінді. Нәтижесінде Ji Yue коллаборациясы пайда болды.

Ji Yue («Джи-Е» деп оқылатын сияқты) премиум кластағы «ақылды көлік» шығарады. «Электрлі мобильділіктің болашағына жарқын көзқарас» деген ұранынан марканың бұл атаумен электромобиль өндіретінін білуге болады. Сонымен қоса Қытайда фирмалық қуаттау станцияларын салып, дамыта бастайды.

Батареялы Ji Yue 01 — брендтің тұңғышы. Ол Geely-дің Zeekr 001 және Smart #1 модельдерімен бір платформаны бөліседі. Ресми мәлімет бойынша Ji Yue 01-дің базалық комплектациясында 272 ат күшін беретін электрлі қозғалтқыш артқы осьте, ал толық жетекті түрінде осындай мотор алдында тұрады. Компания екі батарея ұсынады: бірі — SVOLT шығарған темір-фосфатты батарея, екіншісі — CATL фирмасының никель-кобальт-марганецті (NMC) батареясы. Жаңа модель автономды жүргізу жүйесімен бірге жүргізуші ассистенттерінің толық жинағымен жабдықталады.

Концерн Ji Yue 01 туралы толық ақпаратты 2023 жылдың IV тоқсанында, яғни модельдің тұсаукесері өтіп, саудаға шыққанда жариялайды.