Қытай көліктері шетелде аса арзан емес

Шетелдік жүргізушілер Қытай көліктерін аса төмен бағада күтпесе де болады. Бұл ақпаратты Reuters басылымы жариялады.

Қытайда автоөндіріс шығынының төмендеуі бірнеше факторға, соның ішінде ішкі нарықтағы үлкен сұранысқа байланысты. Төмен баға қойса да, қытайлық және шетелдік компаниялар машина сатудан пайда таба алады.

Қытайда арзан батарея электромобиль құнының төмендеуіне әсер етеді, өйткені ол электрокар бағасының үштен бірін құрайды. Benchmark Mineral Intelligence сарапшылары Қытайда аккумулятор басқа елдерге қарағанда 18 % арзан екенін анықтады. Мысалы, өз батареясын пайдаланатын BYD сияқты концерндер клиентке көптеген жеңілдік жасауға дайын.

Қытай билігі отандық автоөндірушілерге жер мен электр қуатын төмен бағада береді. Сондай-ақ жұмысшылар жалақысы мен әлеуметтік төлемдер көп емес.

Қытай брендтері шетел нарығына шыққанда, әсіресе өмір сүру деңгейі жоғары елдерде ойын ережесін өзгертеді. Олар өзге нарықта өнімін қымбат сатып, шетелдік клиенттерден көбірек пайда алуды ойлайды.

BYD экспортқа жақсы жабдықталған қымбаттау электромобиль шығарады. Еуропада BYD Atto 3 бағасы Қытайға қарағанда — 81–174 %, ал Dolphin-нің құны 39–178 % жоғары. BYD Dolphin өз елінде 16 524 доллар тұрса, Германияда 37 439 долларға сатылады. Салыстыру үшін айтсақ, Қытайда шыққан Tesla Model 3 Германияда аспан асты еліндегіден небәрі 37 % қымбат тұрады.

Сол үшін өзге елдің автоөндірушілері Қытай импортынан қорғануға күш салып жатыр.