Пилотсыз көлікті жолға шығару үшін краш-тест тәсілін өзгерту керек

Жолаушы жатып алып сапарлай алатын гравитациядан ада креслосы бар машиналардың нарыққа шығуы Tesla Cybercab, Zoox сияқты не рөлі, не педалі жоқ пилотсыз көлікпен байланысты біраз мәселенің бетін ашты. Себебі олар жолаушылардың ойнап, жұмыс істеп, одан қалса ұйықтауына жағдай жасайды. Алайда қазіргі қауіпсіздік стандарты тек отырған адамға сәйкес әзірленген.

Мәселен, белдік жамбас сүйекті мықтап ұстап тұрады. Жолаушы шалқалай жатса, іштің жұмсақ тіндеріне жылжып кетіп, салдарынан адам ауыр жарақат алуы ықтимал. Қауіпсіздік жастығы да тік күйдегі денені ғана қорғайды.

Кейінгі жылдары АҚШ-та тіркелген 42 ауыр апатта жолаушылардың орындығы шалқайып тұрған деп жазды Wired. Бірақ мамандар ондай оқиға саны әлдеқайда көп деп санайды, өйткені құтқарушылар зардап шеккен кісіні тез шығарып алады да, апат сәтінде оның қандай күйде болғанына мән бермейді.

Қазір краш-тест өткізетін ұйымдардың ешқайсысы гравитациясы жоқ креслоның қауіпсіздігін тексермейді, енді бұл іске қытайлар кірісуі мүмкін. Humanetics дерегінше жоғары технологиялы манекендер жасайтын THOR-AV компаниясының қосымша сезгектері бар өнімін CCARI (Қытайдың сертификаттаушы органы) қолдана бастапты.

Біз сөз етіп отырған креслоның қауіпсіздігін қозғалыс кезінде анықтау мәселесін Қытай мамырда көтерген. Заң шығарушы орган жүргізуші орындығының 35 градустан, жолаушы орындығының 45 градустан артық шалқаймауын қадағалайтын норма ұсынып, жылдамдық артқанда ескертетін және креслоның автоматты түрде тіктелуін қамтамасыз ететін жүйе енгізуді талап етеді деген болжам бар. Ал жантая кетуге ыңғайлы орындығы бар көлікті көрші ел 2-3 жылдан кейін ресми түрде сынақтан өткізе бастайды.