Кейінгі бірнеше айда Қазақстанда жанармай құны үздіксіз өсіп жатыр. Бұл үрдіс қыркүйекте де жалғасты. Оның үстіне күздің алғашқы айында кей отын түрі күрт қымбаттағаны байқалды.
Алматыдағы Royal Petrol желісінде АИ-92-нің бағасы тамыздағы 225 теңгеден 235 теңгеге жетті, яғни өсім 10 теңге болды. Helios, Sinooil, Qazaq Oil сияқты ірі бекеттерде АИ-92-нің бағасы дәл осындай. Тек «Газпромнефть» бензиннің осы түрін 236 теңгеге сатады.
Алматыда АИ-95 бензинін 285–297 теңгеге табасыз. Мұндай бензиннің ең арзаны — Helios-та, ең қымбаты — «Газпромнефть» бекетінде. Тамызбен салыстырғанда 5–10 теңге өсті.
Қалада жазғы дизель 327–333-тен саудаланып жатыр. Бұл бір ай бұрынғыдан 5–10 теңге жоғары. Ең қымбат дизель Qazaq Oil-да. Жыл басынан бері мұнда дизель бағасы 34 теңге көтерілді.
Астанада қыркүйектің аяғында АИ-92 құны 231–235 теңгеге жетті. 29 тамызда 227–228 теңге болған. Елордада АИ-95 бензині — 273–288 теңге (+3–15 теңге), дизель 321–323 теңге (тамызда 318–319 теңге болған) тұрады.
Шымкентте де жанармай бағасы шарықтады. Бірақ оңтүстікте салыстырмалы түрде арзанырақ. Мұнда АИ-92 бензині 3–6 теңге қымбаттап, әр литрі 217–219 теңгеге жетті. АИ-95 бағасына 8–10 теңге қосылып, 268–274 теңге болды. Ал дизельді жүргізушілер 318–321 теңгеге алады. Бұл шілдедегіден 4–7 теңге жоғары.
Комментариев: 0