Genesis брендінің бесінші концептісі 26 наурызда Лос-Анджелесте жабық форматта көрсетілді. Ақпарат бірнеше күннен кейін ғана көпшілікке жарияланды. Бас дизайнер Санджип Лидің айтуынша, Genesis X купесі Ultimate Athletic Elegance стилінде жасалған. Маңызды шығармашылық жаңалық — Two Lines. Қосарлы көлденең сызық көліктің барлық тұсынан байқалады.
Модельдің техникалық сипаттамасы, тіпті көлемі жайлы ақпарат жоқ. Бірақ көліктің Lencois Blue атты ерекше түске боялғаны белгілі. Бұл түс жаңбырлы маусымда Бразилияның Ленсойс-Мараньенсис Ұлттық паркіндегі құмды төбелер арасында пайда болатын лагунаға ұқсайды. Алайда ол көбіне теңіз түстес деп сипатталады.
Салон жұмсақ былғарымен қапталған. Жүргізуші аймағы қоңыр түсті. Genesis X интерьеріндегі маңызды бөлшек — трансмиссиясының Crystal Sphere электронды селекторы. Ол айналмалы жарты шар түрінде жасалған. Саусақпен ұстайтын шағын тұтқасы бар, қозғалыс режимін бақылау түймесі ортасында орналасқан.
Genesis X-тің коммерциялық болашағы туралы айтуға әлі ерте. Бірақ бұл концепт көпшілікті қызықтыратын секілді. Модель G90 ретінде сатылымға 2022 жылы немесе одан кейінірек шығуы мүмкін. Концепт атауындағы Х әрпі де осы болжамды қуаттайды.
Комментариев: 0