Қозғалтқыш нөмірі электронды паспортта жазылады

Электронды паспорт рәсімдеудің жаңа ережесін Өнеркәсіп және құрылыс министрлігі дайындады. Құжат жобасына сәйкес:

• Қазақстандағы өндірушілер (өздері шығаратын көлік құралына);
• шетелдік өндірушілердің ресми өкілдері (өздері әкелетін, аталған шетелдік өндіруші шығарған көлікке);
• аккредитациядан өткен сынақ зертханалары (жеке тұлға, жеке дилер және т.б. ЕЭО елдерінен немесе алыс шетелден Қазақстанда тіркеу үшін әкелетін өзге көлік құралына);
• электронды паспорт жүйесінің ұлттық операторы (бұған дейін Қазақстанда электронды паспортсыз тіркелген көлік құралына) паспорт рәсімдей алады.

Қазір бұл іспен тек өндірушілер, импорттаушылар және зертханалар айналысады.

Электронды құжатта қозғалтқыш нөмірі де жазылады. Агрегат ауысқан жағдайда көлік иесіне электронды паспорттағы деректерді өзгертуге тура келеді.

Министрлік Kolesa.kz редакциясына құжатқа қозғалтқыш нөмірін жазуды міндеттейтін норманы 2015 жылы ЕЭО комиссиясы қабылдағанын хабарлады. Бірақ ол кезде электронды паспорт рәсімделмеген. Қазір жауапты орган Қазақстанның ережелерін халықаралық ережелерге сай етіп түзеп жатыр екен. Десе де көлік құралын тіркеу туралы куәлікте мотор нөмірі болмайды.

Ведомство өкілдері біздің елде есепте тұрған көліктердің электронды техпаспорты арнайы ХҚКО-да біртіндеп қайта тіркеу процесінде рәсімделетінін айтты. Электронды құжатты мекеме биыл қыркүйекте бере бастайды. Алайда бұл нақты мерзім емес, процестің тез жүзеге асуы «ҰАТ» АҚ мен ҚР ІІМ сервистерін біріктіру жылдамдығына байланысты.

Тағы бір қызық жайт: ЭПТС-тегі «шанақ (кабина, тіркеме) түсі» деген жолаққа дәл қазіргідей негізгі — ақ, сары, қоңыр, қызыл, қызғылт сары, күлгін, көк, жасыл, қара не сұр түстердің бірі жазылады. Дегенмен негізгі түспен қатар оның реңкін немесе автомобильді жасаған компанияның өзі бекіткен түс атауын (мысалы, «қар патшайымы») көрсетуге мүмкіндік беріледі.

Электронды паспортқа «көлік құралы қатысқан жол-көлік оқиғалары туралы мәлімет» жолағы қосылады, онда жол апаты болған күн, уақыт және орын жазылады. Сервистер біріккен соң апатқа қатысты ақпарат полиция базасына түсе салысымен құжатқа шығады.