New York Times (NYT) газеті жүргізген ауқымды зерттеу нәтижесі өндірушілердің автомобиль капотын биіктетуі соңғы жиырма жыл ішінде АҚШ-та мыңдаған адамның өмірін қиғанын көрсетті.
Жоба авторлары 2002-2024 жылдар аралығындағы федералды апат статистикасын, көлік габаритін және дерек базасын талдай келе машинаның дизайнындағы өзгеріс пен жолдағы өлім-жітім арасында тікелей байланыс барын анықтаған. 2009 жылдан бері көлік қағып қаза тапқан жаяу жүргінші саны 75–80 % артыпты, ал адам өліміне әкелген апат саны небәрі 13 % өсіпті.
Зерттеушілер ірі көліктің аса қауіпті болуына екі себеп бар деп түйген. Біріншісі — 1.2-1.3 метрлік биік капот. Машина соққанда жаяу адам бірнеше метр ұшып кетіп, басқа көліктің астына түседі. NYT математикалық моделі капот биіктігінің әр дюйміне (2.54 см) шаққанда өлім қаупі 2.8 % артатынын көрсетті.
Көлік аударылған кезде салондағы адамдарды қорғайтын алдыңғы ірі тіреулер алдыңғы жартылай сфераның шолу мүмкіндігін кемітеді екен. Мұны қазіргі модельдер мен 1990 жылдардың аяғы мен 2000 жылдардың басында шыққан машиналарды үшөлшемді сканерлеу нәтижесі растады. Бойы 168-ден 180 см-ге дейінгі жүргізушілер үшін Ford F-150-дің көрінбейтін аймағы — 25 %, GMC Sierra мен Toyota Tacoma-нікі — 60 %, Chevrolet Silverado пикабынікі еке есеге жуық ұлғайған.
NYT моделіне сәйкес капоты биік көліктің көбеюі 2016-2024 жылдары үш мыңдай адамның қазасына себеп болды. Басылым бұл нақты цифр емес деп санайды, себебі зерттеу барысында федералды дерек базасына кірмейтін тұрақта, өткелде және жеке жолда тіркелетін апаттарды есепке алмаған.
Комментариев: 0