«ҚазАвтоЖол» бетон тақта арасындағы жікті пеноплекспен жамаған

Журналист Диас Нұрақын Алматы — Қорғас тас жолы дұрыс жөнделмегенін көрсететін видео жариялады. Кадрдан бетон жабыны арасындағы жікке пеноплекс тығындап қойғанын көруге болады.

«„ҚазАвтоЖол“ жол жөндеудің жаңа технологиясын ойлап тапты: Алматы — Шелек тас жолын пеноплекспен жамап қойыпты. Енді Қазақстанға жол салу үшін бетон да, битум да қажет емес. Көлік министрлігі, не деп ақталасыздар? Әлде жаңа технологиямызды талқандап, жолды бүлдірдің деп жауапқа тартасыздар ма мені?» — деп жазды видео авторы.

Көп өтпей «ҚазАвтоЖол» жауап берді:

«Алматы — Шелек — Қорғас тас жолының 25—320-шақырымында мердігерлер орташа жөндеу жүргізіп жатыр. Олар плита ауыстырып, цемент-бетон жабынын жөндейді, сондай-ақ бетон арасындағы жікті бекітіп, нығыздайды. Бұл жұмыс жазда атқарылады. Технологияға сәйкес жарыққа бөгде зат түспеу үшін пеноплекс қолданылады (бұл қолданыстағы қалыпты тәжірибе). Жұмыс кезең-кезеңімен жүріп жатыр, видеода жұмыс толық аяқталмаған кездегі жағдай көрсетілген. Алда мердігер ұйым битум мастикасын құйып, жұмысты толық аяқтайды.

Қайталап айтайын, видео жазылған кезде жол бөлігінде жұмыс толық аяқталмаған. Аталған материал тиісті шешім мен шара қабылдау үшін уәкілетті органға жолданады», — деді ұлттық компанияның баспасөз хатшысы Ләззат Стамғазиева.

Журналист түсірген жол бөлігіндегі бетон жігін ертеңінде-ақ битуммен толтырыпты. Оның астына қандай материал қолданғаны жұмбақ күйінде қалды.

Кейін Диас Facebook парақшасында тас жол бойында тоқтау ережесін бұзғаны үшін (жол жиегінде сары сызық сызылған) полиция жауапқа тартқанын жазды. Сондай-ақ журналиске белгісіз нөмірлерден қоңырау түсіп, WhatsApp желісінде жолды бүлдірдің деп қоқан-лоқы жасаған хаттар келген.

Kolesa.kz редакциясы оқиғаны бақылауда ұстайды.

Үш жыл бұрын Алматы — Қорғас тас жолында бетон тақта көтеріліп, трамплин пайда болған. Кейін Түркістан облысындағы бетон жолдарда да осындай жағдай болды. Осыдан кейін Автомобиль жолдары комитеті мұндай ақаудың алдын алу тәсілін тапқанша бетон жол салуды тоқтатты. Ал қазір бар бетон жолдар жөндеуден өтеді.

Бірақ биыл бетон тақта көтерілді деген факті тіркелген жоқ.