23 шілдеде М-32 «Самара — Шымкент» тас жолының Түркістан облысына қарасты Темірлан ауданындағы бөлігінде бетон плита көтеріліп кетті. Оқиға болған жерден түсірілген фотолардан полимерлі асфальт төселген орыннан ақау шыққанын көруге болады.
Бүгін ҚР ИИДМ Автомобиль жолдары комитеті апат болған бөлік жөнделгенін хабарлады.
«Бүгінгі таңда бетон плиталарының көтерілуіне жол бермеу мақсатында плиталардың жылжуына арналған технологиялық тігістерді дереу тазарту шаралары қабылданды. Сондай-ақ, микросюрфейсинг төсеу жұмыстарын уақытша тоқтату туралы шешім қабылданды. Бұдан бөлек кеңейтудің температуралық тігістерін күнделікті патрульдеу ұйымдастырылды», — деп мәлімдеді жол жөндеушілер.
Министрлік берген мәлімет бойынша «ҚазАвтоЖол ҰК» АҚ Түркістан облыстық филиалының директорын қызметінен босатуға кеңес беріліпті. Оған қоса жолдарды күтіп ұстау сапасын тиісінше бақыламағаны үшін «Жол активтерінің ұлттық сапа орталығы» ШЖҚ РМК өңірлік филиал басшысы жауапқа тартылады.
Бетон жолдарда плитаның көтерілуі алғаш болып отырған жоқ. Былтыр жазда Түркістан облысында соған ұқсас 45 жағдай тіркелген. Содан кейін жол мамандары бетон үстіне полимерлі асфальт төсеу туралы шешім қабылдады. Жоспарға сәйкес бұл кезекті төтенше жағдайдан сақтауға тиіс еді. Алайда ыстықтан қара жабын қаттырақ қызатыны белгілі, ал ажырап кеткен бетонды жұқа наноасфальт ұстай алмайды.
Енді бетон жолдардың жыры қашан бітетінін күтеміз. Дүйсенбі күні ҚР ИИДМ АЖК аталған мәселеге қатысты ресми түсінік береді.
Комментариев: 0