Қазақстан мен Біріккен Араб Әмірлігінің ішкі істер министрлері жүргізуші куәлігін өзара қабылдау туралы меморандумға қол қойды. Ішкі істер министрлігі хабарлағандай, бұл әкімшілік рәсімді жеңілдетіп, екі ел азаматтары үшін қолайлы болады.
Жыл сайын БАӘ-ге шамамен 400 мың Қазақстан азаматы барады. 14 мыңға жуығы сонда тұрады.
«Меморандумның арқасында жүргізуші куәлігін пайдалану және ауыстыру барынша ыңғайлы болады. Меморандум ұлттық жүргізуші куәлігін екі елде де қолдануға мүмкіндік береді және құжатта көзделген жағдайларда оларды жеңіл ауыстыруға болады», — деп түсіндірді ведомство.
Ішкі істер министрлігі меморандум екі тарап ішкі мемлекеттік рәсімді аяқтағаннан кейін ғана күшіне енеді деді. Жүргізуші куәлігін өзара қабылдау үшін нормативтік-құқықтық актілер әзірлеп, қабылдау қажет.
Қазір Қазақстандық жүргізуші куәлігі БАӘ-де жарамсыз. Әмірлікте көлік жүргізу үшін халықаралық куәлік алу қажет. Алайда мұндай құжатты ҚР Ішкі істер министрлігі бермейді. Оны International Drivers Associations өкілдігі сияқты жеке компания рәсімдеп, жүргізуші куәлігінің аудармасы бар арнайы кітапша сатады. Меморандум күшіне енсе Қазақстан азаматы мұндай халықаралық жүргізуші куәлігін алмай, БАӘ-де ұлттық жүргізуші куәлігімен-ақ машина жалға ала алады.
Комментариев: 0