Alfa Romeo-ның өткенін еске салатын 55-SGT

1993 жылғы DTM жарыс маусымында Alfa Romeo 155 V6 TI жеңіске жетті, ол 20 бәсекенің 12-сінде (оның ішінде әйгілі Нюрбургринг те бар) топ жарды. Зауыт командасының бұл жетістігі өте маңызды болды, өйткені немістер өз чемпионатында жеңіліп қалды.

Бірақ өткен ғасырдың аяғындағы бұл жеңісті италиялықтардың өзі ұмыта бастаған. Сондықтан Ferrari, Abarth және Maserati-дің бұрынғы қызметкерлері құрған SGT Automobili студиясы 55-SGT деп аталатын оммаж жасап, сол даңқты кезеңді қайта еске алуға бел буды.

1 / 11

• 
• 
• 
• 
• 
• 
• 
• 
• 
• 
• 

1 / 11

Жаңа жобаның бамперге қарай сүйірлене түсетін сына тәрізді алдыңғы бөлігі, ретрооптика, жалпақ аркасы бар төртбұрыш қанаты, ірі аэродинамикалық бастырығы ескі модельді еске салады. 55-SGT сырттай седанға ұқсайды, бірақ іс жүзінде екі-ақ есігі бар. Дегенмен төрт есікті Alfa Romeo Giulia Quadrifoglio-ға негізделген.

Шеберлер шанақ материалын еш үнемдемепті, седанды әрлеуге көмірпластик, кевлар және карботаний пайдаланған. Соның арқасында әу бастағы 1.7 тонна салмағы шамамен 140 келі жеңілдеді.

55-SGT-дің мотор бөлігінде донор Giulia Quadrifoglio-ның 2.9 литрлік битурбо V6-сы тұр. Ателье оның қуатын 505 ат күшінен қарапайым жолға арналған Stradale үшін 611 ат күшіне, ал Trofeo трек нұсқасы үшін 740 ат күшіне арттырған. Сондай-ақ екі түрленім ең жоғары қуатын базалық автомобильдегідей 6500 емес, 7800 айн/мин-та береді.

Қозғалтқыш рөл астында орналасқан ауыстырғышы бар 8 сатылы ZF автомат қорабымен және фирмалық SGT толық жетек жүйесімен жұмыс істейді. Бұл жүйе тарту күшін артқы оське 50:50-ден 20:80-ге дейін бөле алады. Ал дрифт режимінде бүкіл айналу моменті артқы дөңгелектерге беріледі.

1 / 5

• 
• 
• 
• 
• 

1 / 5

Қауіпсіздік каркасы бар салон екі адамға арналған, бірақ сән-салтанаты мен әрлеу сапасы жоғары деңгейде сақталды. Әсіресе ортаңғы консольдегі қиғаш панель көз тартады. Ондағы металл ауыстырғыштар арқылы салон функцияларын ғана емес, амортизатор мен аэродинамикалық элементтердің параметрін де реттеуге болады.

Көрмеге қатысатын алғашқы 55-SGT-ден кейін компания Opening Edition сериясының 10 экземплярын шығаруды жоспарлап отыр. Бағасы 500 мың еуродан басталады. Пилоттық партия сәтті өтсе, ателье тағы 110 автомобиль құрастырады.