«Қазселденқорғау» мемлекеттік мекемесі Алматы, Жамбыл және Жетісу облыстарындағы тауға жақын тұратын халыққа өзендегі су деңгейі көтерілуі ықтимал екенін ескертті.
«3-5 шілдеде аралығында Алматы, Жамбыл, және Жетісу облыстарының таулы және тау алды аудандарында жоғары ауа температурасы мен нөсер жаңбыр болжамына байланысты өзендерде су деңгейі көтерілуі және қарқынды беткей ағындары күтілуде. Сырғыма және сел құбылыстары орын алуы мүмкін» — деп жазды мекеме өкілдері.
Мамандар аталған өңірлердің тұрғындарына алдағы демалыста көкке шығып, тауға бармауға және сақтық шараларын сақтауға кеңес берді.
Мемлекеттік мекеме өкілдері Қарғалы, Ақсай, Үлкен және Кіші Алматы өзендерін күндіз-түні бақылап отыр. Әзірше таудағы суқоймаларда жағдай тұрақты.
Қарасай ауданына қарасты Жаңатұрмыс ауылында «Карьер Аксай» ЖШС аумағында өзен жағасы шайылып, салдарынан карьердің солтүстік-батыс бөлігінде топырақ жылжып кеткен. Қауіпсіздікті сақтау үшін құтқарушылар осы маңдағы 9 үйдің тұрғындарын көшірді.
Еңбекшіқазақ ауданындағы Түрген өзенінен екпіндей аққан су Асы жайлауына апаратын автомобиль жолын шайып кеткен. Мамандар 42 адамды таудан түсірді, ішінде 5 бала бар. Қазір жолды қалпына келтіріп жатыр. Табиғат апатынан «Түргенсай» демалыс аймағының да кей бөлігі бүлінді.
Комментариев: 0