Қазақстандағы жолдар мінсіз бе?

Көлік министрлігінің өкілдері кеңесте хабарлағандай, былтыр 13 мың шақырым жол жөнделді. Оның 6 мың шақырымы аяқталған: 3 мыңы республикалық маңызы бар, қалғаны жергілікті трасса. Жыл қорытындысы бойынша республикалық (94 %) және жергілікті (91 %) трассалар нормаға сәйкес келеді.

Стандарт бойынша жолда ұзындығы 15 см-ден, тереңдігі 5 см-ден, ауданы 0.06 шаршы метрден (шамамен 25×25 см) аспайтын ақау (шұңқыр, шөгінді, ойық, жарық және т.б.), сонымен қатар тереңдігі 5 см-ден және ұзындығы 100 метрден аспайтын жолтабан болса ештеңе етпейді. Яғни, трассадағы ақау техникалық құжатта белгіленген мөлшерден аспаса, ол «нормаға сай» деп есептеледі.

Биыл мамандар республикалық және жергілікті маңызы бар трассалардың 11 мың шақырымнан астамын күрделі және орташа жөндеуден өткізбекші. Жауапты орган өңіраралық көлік байланысын нығайтуға және елдің транзиттік мүмкіндігін арттыруға зор үлес қосатын «Орталық — Батыс», «Қарағанды — Жезқазған», «Сарыағаш айналма жолы» және басқа жобаларды жүзеге асырады.