Қазақстан жолдары «Суперасфальт» технологиясымен салынады

Superpave (Superior Performing Asphalt Pavements) — өткен ғасырдың 90 жылдары Американың мемлекеттік жол және транспорт қызметкерлері ассоциациясы (AASHTO) әзірлеген асфальтбетон жабынын жобалау жүйесі, ол аймақтағы температура ерекшелігін, транспорт мөлшерін және ауыр жүк көліктерін ескере отырып жасалады. Қазір Қазақстанда мамандар автожол жобалағанда үш климат белдеуін ғана ескеріп, екі-ақ түрлі битум пайдаланады. Ал Superpave технологиясы бойынша 10–15 климат белдеуін есепке алып, әр аймақ үшін арнайы асфальтбетон, битум және қиыршық тас қоспасын әзірлеуге мүмкіндік бар.

Бүгін Орталық коммуникациялар қызметінде өткен брифингте шенділер жол жөндеушілер жаңа өнімді зертханада сынақтан өткізіп, биыл жеті жол бөлігінде сынап көретінін айтты.

Superpave технологиясы бойынша мына жолдарға асфальт төселеді:

• Қонаев — Күрті тас жолының қайта жөндеуден өтетін бөлігі (1 км);
• Қызылорда — Жезқазған — Қарағанды ​— Шідерті трассасының қайта жөндеуден өтетін бөлігі (1 км);
• Алматы — Көкпек — Шонжы — Көктал — Қорғас тас жолының орташа жөндеуден өтетін бөлігі (1 км);
• Доссор — Құлсары — Бейнеу — Сай-Өтес — Шетпе — Жетібай — Ақтау порты жолының орташа жөндеуден өтетін бөлігі (Шетпеден Жетібайға дейін) (1 км);
• Денисовка — Тавриченка — Аршалы — Комаровка трассасының орташа жөндеуден өтетін бөлігі (1 км);
• Алматы — Өскемен — Шемонаиха — РФ шекарасы автожолының орташа жөндеуден өтетін бөлігі (1 км);
• Астана — Қарағанды — Алматы тас жолының күрделі жөндеуден өтетін бөлігі (1 км).

АҚШ технологиясын енгізген соң елдегі жолдар сапалы болады дегенге сенесіз бе?