Youtube арналарының бірінде автокөлікшінің Орынбор облысынан 15 шақырым жердегі қазақстандық жанармай құю бекетінен түсірілген бейнежазбасы пайда болды.
Біз Қазақстандамыз, Орынбор облысынан 15 шақырым жерде. Мен 75 литр бензин құйып, 1 900 рубль төледім. Бензиннің литрі 145 теңге тұрады. Бұл жанармай Ресейде шығарылған, газ да. Ресейліктердің бәрі өз отанында өндірілген бензинді осы жерден сатып алады. Рубльге шаққанда, газ бағасы — 10 рубль, ал бензиннің құны — 26.50 рубль. Бұл масқара ғой. Бұл шектен шыққандық«, — дейді видео авторы. «Айтпақшы, бензин Уфада өндірілген, сәйкестік сертификаты ілініп тұр», — деп толықтырды ол сөзін.
Салыстыру мақсатында айта кетсек, Екатеринбургте АИ-92 маркалы бензин шамамен 41.58 рубльге, ал АИ-95 44.88 рубльге сатылған. Биылғы жылдың мамыр айында жанармай Ресейдің 58 аймағында қымбаттады, ал маусымда Тува, Иркутск, Кемерово, Новосибирск, Забайкалье, Алтай және Краснояр облыстарында, Қазан, Петрозаводск, Омск және Сахалинде бензин бағасы тағы көтерілді. 1 шілдеде отын бағасы кезекті рет өседі деп күтілуде. Көрші елдің Қазақстанға жақын аймақтарындағы тұрғындардың бензин алу үшін біздің елге келетіні таңғаларлық жайт емес.
Біраз уақыт бұрын ресейлік талдаушылар бағадағы үлкен айырмашылықты түсіндіре отырып, ҚР мен РФ арасында шикізаттың бағасы мен оны өңдеуге және дистрибуциялауға кететін шығынның бірдей екенін айтқан болатын. Бірақ Ресейдегі чектің басым бөлігі пайдалы кен өндірісіне салынатын салық, акциз және т.б салық түрінде мемлекет бюджетіне кетеді. Ал Қазақстанда мұндай төлемдер әлдеқайда аз.
Мамыр айында қазақстандық бекеттердегі жанармай бағасының екі теңгеге жуық арзандағанын айта кеткен жөн. Ал жуырда елдің бас мұнайшысы Қ. Бозымбаев отынның елде тым көп екендігін және жақында оны Еуропаға экспорттай бастайтынын мәлімдеді.
Комментариев: 0