Әлеуметтік желіде «ҚазМұнайГаз — Аэро» компаниясының 14-42 нөмірімен тіркелген құжаты тарап кетті. Онда мұнай өнімдерінің 2020 жылы талондық жүйе бойынша құны көрсетілген, әрі ол нарықтағы бағадан әлдеқайда жоғары. Егер «ҚазМұнайГаз бекеттерінде АИ-92 149 теңгеден сатылып жатқан болса, құжатқа сәйкес ол 181 теңге тұрады. Жанармай құю бекеттерінде 191 теңгеден саудаланып жатқан дизельдің құны мұнда 217 теңге деп көрсетілген.
Желідегі жазбаға пікір қалдырған ел тұрғындары бағаның күрт өскеніне алаңдаушылық танытуда. Дегенмен алдын ала дүрлігудің қажеті жоқ. «ҚазМұнайГаз — Аэро» әдеттегі бекеттерге жанармай жеткізбейді. ҚР Үкіметінің 2014 жылдың 12 желтоқсанындағы «Мұнай өнімдерін жеткізу жөніндегі бірыңғай операторды белгілеу туралы» қаулысына сәйкес, олардың клиенті ҚР Қарулы Күштері, ҚР Ұлттық қауіпсіздік комитетінің Шекара қызметі, ҚР Ұлттық ұланы болып табылады.
Компанияның баспасөз қызметі де аталған құжаттың таралып кеткенінен хабардар. Facebook-тегі парақшасында олар азаматтық тұлғалар мен ұйымдарға мұнай өнімдерін жеткізумен айналыспайтынын хабарлады. Ал жоғары баға жыл соңына дейін бекітілген және ол бағаның ауытқуы салдарынан болуы мүмкін қауіптерді ескеру арқылы белгіленген.
Комментариев: 0