Жол мамандары ақылы жолдардың күнделікті күзетілетініне қарамастан, бөтеннің мүлкіне көз салатындардың азаймай отырғанына налиды. «QazAvtoJol» ҰК» АҚ-ның баспасөз қызметі хабарлағандай, 2018 жылдан қазіргі уақытқа дейін Нұр-Сұлтан — Щучинск тас жолында 10 ұрлау дерегі тіркелді. Сымдарды, қоршау торларын ұрлаған қаскөйлер 2018 жылдың сәуірінде күркені, ал осы жылдың тамызында дизель-генераторлы қондырғыны үптеп кеткен. Бұдан бөлек, ақылы жолдан 7 прожектор, 30 жарықтандыру элементі және 412 консоль ұрланды. Жақында ғана іске қосылған Нұр-Сұлтан — Теміртау тас жолынан қылмыскерлер төрт түліктен қорғау үшін орнатылған қоршаудың 500 метрін алып кеткен.
Қазавтожолдықтардың айтуынша, Алматы облысында да жағдайдың оңып тұрғаны шамалы. Алматы — Қорғас тас жолынан 35 шақырым электр желісі ұрланса, Байсерке, Ақбастау және Қазатком бұрылыстарындағы жолайрықтарда тұрған үш трансформатор ұрылардың қолында кеткен. Алматы — Қапшағай тас жолында сымдар үш рет ұрланып, жалпы көлемі 6 шақырымды құрайтын кабельдер қолды болды. Одан бөлек, кейбір «қор жинағыш саяхатшылар» демалыс алаңдарынан бірнеше рет орындықтар мен үстелдерді, тіпті тұрақ павильондарын да алып кетіпті.
Комментариев: 0