Ұлттық статистика бюросының дерегінше 2026 жылғы 1 сәуірге дейін Қазақстанда электрлі қозғалтқышы бар 31 100 көлік құралы тіркелген. Оның ішінде 23 876 жеңіл автомобиль, 149 жүк көлігі, 500 автобус, 28 мотоцикл, 1 310 А1 санатындағы техника (электроскутер және т.б.) және 5 237… тіркеме бар.
Электромотормен жүретін қандай тіркемені есепке алғанын Ұлттық статистика бюросы нақты айтқан жоқ. Бәлкім өз батареясы мен электромоторы бар, қозғалыс кезінде тартқышқа (автомобильге) көмектесіп, жанармай шығынын азайтатын немесе электромобильдің жүріс қорын арттыратын инновациялық трейлерді айтып отырған болуы мүмкін. Бірақ мұндай технология әлі толық дайын емес, сондықтан Қазақстанда оның бес мыңнан аса экземпляры бар екеніне сену қиын.
Электрлі көлік құралының саны бойынша Алматы қаласы көш бастап тұр. Мегаполисте 14 950 жеңіл электромобиль, 63 жүк көлігі, 255 электробус, 498 электроскутер және 7 электромотоцикл бар.
Екінші орында — Астана қаласы: елордада электромотормен жүретін 2 754 жеңіл машина, 23 жүк көлігі, 114 автобус, 69 скутер және 5 мотоцикл тіркелген.
Үшінші орында Алматы облысы тұр. Онда батареялы 1 553 жеңіл көлік, 16 жүк көлігі, 154 скутер, 2 мотоцикл және 1 автобус бар.
Статистика бойынша электрокар Абай облысында ең аз. 2026 жылғы 1 сәуірде бұл өңірде небәрі электрлі 65 жеңіл автомобиль, 32 скутер және 1 мотоцикл бар еді.
Электромобиль саны қалай өсті
Тура бір жыл бұрын, 2025 жылғы сәуірде Қазақстанда 14 266 электромобиль болған (13 718 — жеңіл көлік, 370 — жүк көлігі, 178 —автобус). Яғни 2026 жылғы көрсеткіштен екі есе аз. Елде электрлі көлік құралының күрт көбеюіне электрокарды жеке пайдалану үшін кедендік алым мен ҚҚС төлемей әкелуге берілген жеңілдік әсер еткені анық. Бірақ мұндай машинаны ЕАЭО елдеріне сатуға болмайды. Квота 2025 жылы күзде таусылған, жеңілдік мерзімі ұзарған жоқ. Өйткені ДСҰ тарифі бойынша біздің елге электромобильді кедендік алымсыз әкелуге болады.
Кейінгі жылдары елге кірген электрлі машиналардың көбі Қытайдан сұр импорт арқылы жеткен, аз бөлігін ғана ресми шоурумдар сатты.
Комментариев: 0