Электромобиль әкелетіндер квота ала алмайды

2022 жылдың көктемінде Еуразиялық экономикалық комиссия Қазақстан тұрғындарына 2025 жылдың 31 желтоқсанына дейін 25 мың электромобильді ЕЭО елдеріне сату құқығынсыз, тек жеке пайдалану мақсатында кедендік алым және ҚҚС төлемей, жеткізуге рұқсат берген еді. Жеңілдік келер жылы 1 қаңтарда күшін жояды, бірақ Қаржы министрлігінің Мемлекеттік кірістер комитетінің мәліметінше елімізге берілген квота биыл 15 қазанда біткен.

Қазақстан ДСҰ-ға кіргеннен кейін қабылданған хаттамаға сәйкес жеңіл электрокар үшін кедендік алым 0 % болып қала береді, бірақ оны ел аумағынан тыс жерде сатуға рұқсат жоқ.

Дегенмен қосымша құн салығын төлеу керек. Биыл салық мөлшері жеткізу мен кедендік құнның 12 %-ын құрайды, 2026 жылдан бастап жаңа Салық кодексінің 503-бабына сәйкес 16 % болады.