Қазақстанда MotoGP жарысы өтпейді

Автомотоспорт және MotoGP жанкүйерлері үшін жаман жаңалық. Қыркүйектің аяғында өтуі керек болған Sokol International Racetrack-тегі жарыс болмайтыны туралы ресми хабар шықты.

MotoGP сериясын ұйымдастырушы Dorna Sports, Халықаралық мотоспорт федерациясы (FIM) және мотожарыс командаларының халықаралық қауымдастығы (IRTA) бірлескен мәлімдемесінде биыл Қазақстан Гран-приі көктемгі тасқындардың салдарынан туындаған операциялық және логистикалық қиындықтар себебінен өтпейтінін хабарлады.

Шілденің басында сыбыс пайда болғанда жарыс Алматы маңындағы трассаның орнына Катарда өтуі мүмкін деген болжам болған, бірақ шараны екінші рет Италиядағы Эмилия-Романья әкімшілік аймағындағы Мизано халықаралық автодромы қабылдайды.

Қазақстандағы MotoGP дебюті бірінші рет кейінге қалып отырған жоқ. Басында алғашқы жергілікті Гран-при былтыр шілдеде өтеді деп жоспарланған болатын. Sokol International Racetrack-тегі омологация жұмыстарының жалғасуы, сондай-ақ жаһандық операциялық қиындықтар жарыстың өтпеуіне себеп болған. Биыл жарыс 14-16 маусымға жоспарланған еді, бірақ мамырдың басында су тасқынына әкелген ауа райы жағдайларына байланысты болмайтыны туралы хабарланды. Кейінірек ұйымдастырушылар Үндістандағы кезең өтпейтініне байланысты Қазақстан Гран-приін 20-22 қыркүйекке ауыстырды.

Жарыс 2025 жылы өте ме белгісіз, бірақ үміт бар, өйткені Қазақстандағы трекпен бес жыл келісім жасалған, оның екі жылы жарыссыз өтті.