Жыл басында Seblajoux Racing құрамымен бірге Michelin 24H Dubai жарысында күміс жүлдеге қол жеткізген, сондай-ақ әйгілі Сартэ трассасындағы Porsche Cup-қа қатысқан қазақстандық пилот Александр Артемьев енді Германиядағы аңызға айналған Нюрбургрингте өнер көрсетуге дайындалып жатыр. Осы демалыста, нақтырақ айтқанда 20 маусымда ол Германияның Nürburgring Langstrecken-Serie (NLS) сериясындағы 6 сағаттық марафонға қатысады.
Артемьев JUTA Racing командасының құрамында 507-нөмірлі көлікпен жарыс жолына шығады. Ол VT2-RWD класындағы BMW 330i седанын тізгіндейді. Porsche 911 GT3 Cup секілді қуатты көліктен әлдеқайда қарапайым әрі сериялық автомобильге жақын болидке ауысу төмен деңгей сияқты көрінуі мүмкін, бірақ бұған себеп Нордшляйфе трассасының ерекшеліктері мен ұйымдастырушылардың талаптары. Өйткені GT3 категориясында өнер көрсету үшін жергілікті А класындағы лицензия қажет. Оны алу үшін жүргізуші алдымен бірнеше дайындық кезеңінен өтіп, В категориясындағы лицензия иегері атануға тиіс. Кейін қарапайым көлікпен бір жарыс кезеңін ереже бұзбай және ескертусіз аяқтауы керек. Бұл талаптарды тіпті суперлицензия иегері әрі Формула-1 чемпионы Макс Ферстаппен де орындады.
Александр Артемьев бұл жарысты Нордшляйфедегі әйгілі 24 сағаттық марафонға апарар алғашқы қадам ретінде қарастырады. Қазақстандық пилот оған 2027 жылы қатысуды жоспарлап отыр.
Тікелей эфирде көргісі келетіндер мына сілтемеге өтіп, YouTube-тегі трансляцияны көре алады.
Комментариев: 0