Қылмыскерлерді Сыбайлас жемқорлыққа қарсы қызметтің тергеушілері мен Бас көлік прокуратурасы анықтады. Мекеменің баспасөз қызметі хабарлағандай, жалған техникалық тексеріс жүргізумен айналысқан топ төрт жыл бойы жүргізушілерден ақша жинап келген. Істің басында ҚР ИИДМ Көлік комитетіндегі лауазымды тұлғалар тұрған. Әр өңірде көлікті тек қағаз жүзінде тексеретін, яғни не құрылғысы, не маманы жоқ 28 фирма қызмет етіпті. 2000 теңге берген көлік иесіне 5 минутта «қызмет» көрсететін алаяқтар 2017 жылдан бері 260 мыңнан аса диагностикалық карта таратқан.
Сыбайлас жемқорлыққа қарсы қызмет өкілдері заңнамаға тиісті өзгертулер енгізіп, «қағаз жүзінде техникалық тексеріс жүргізу» деректерін боолдырмау үшін шара қолданылатынын мәлімдеді. Айта кетерлігі, болашақта жалған карта алған көлік иелері де жазаға тартылуы мүмкін. Әкімшілік кодекске енетін тиісті түзетуді қазір ҚР Әділет министрлігі әзірлеп жатыр.
Біздің елде көліктің техникалық тексерістен қалай өтетінін бәрі біледі. Сондықтан бірнеше жыл бұрын жемқорлыққа қарсы қызмет мамандары бұл іс алаяқтардың азығына айналғанын және жол қауіпсіздігіне еш әсері жоқ екенін айтып, көлік тексеруге мараторий жариялауға шақырған еді. Алайда идея жауапсыз қалды.
Комментариев: 0