Қандай айыппұл амнистияға ілінеді?

Жаңа Конституциясының қабылдануына орай амнистия жариялау туралы заң жобасын Мәжіліс депутаттары қарап жатыр. Қылмыстық амнистия шеңберінде ауыр зардап тудырмаған қылмыстық әрекет пен жеңіл немесе орташа қылмыс үшін жауапкершіліктен босату, сондай-ақ шығын толық өтелген жағдайда ауыр және аса ауыр қылмыс үшін жаза мерзімін қысқарту жоспары бар.

Елде алғаш рет әкімшілік амнистия жарияланды. Мәжіліс депутаты Снежанна Имашеваның айтуынша билік бірнеше млрд теңге айыппұлды кешіреді. Бұл негізінен полиция салған айыппұлға қатысты сияқты. Бірақ жол ережесін өрескел бұзып, адам өмірі мен денсаулығына қауіп төндіргендер (мысалы, бағдаршамның қызыл түсіне өткен, жылдамдықты асырған, мас болып көлік жүргізгендер) амнистияға ілінбейді.

«Ал қауіпсіздік белдігін тақпау, рөлде отырып телефон пайдалану сияқты әрекеті үшін айыппұл арқалаған азаматтар амнистияға ілінуі ықтимал. Билік өсімпұлдың да, айыппұлдың да күшін жояды», — деді С. Имашева.

Қазір Алматы, Астана және Шымкентте полиция мен прокуратура айып балын есептеу жүйесін сынақтан өткізіп жатыр. Жиі ереже бұзып, 20 балл жинаған азамат 6 айға жүргізуші куәлігінен айырылады.