Астанадағы 5-сериялы BMW-ның иесі елордада жол ережесін жүйелі түрде бұзғаны үшін 15 тәулікке әкімшілік қамауға алынды.
Астана Полиция департаменті хабарлағандай, наурыздың басынан маусымның аяғына дейін жүргізуші камераға 87 рет түскен, оның 55-інде жылдамдықты асырған. Соның ішінде аса өрескел жағдайлар да бар. Радар 60 км/сағ рұқсат етілген жерде BMW-ның 151 км/сағ жылдамдықпен жүргенін тіркеген. Көлік бірнеше рет 129 км/сағ жылдамдықпен өткен.
Әкімшілік кодекстің 592-бабына сәйкес жүргізуші жылдамдықты 60 км/сағ және одан жоғары мөлшерде алғаш рет асырғаны үшін 40 АЕК (173 мың теңге) айыппұл арқалайды, сол әрекетін қайталаса, 60 АЕК (259 500 теңге) мөлшерінде айыппұл салынады.
Полиция қалған 32 хаттаманы BMW иесі қоғамдық көлікке арналған жолаққа заңсыз шыққаны үшін толтырған.
Комментариев: 0