Жоғары технологиялы электромобильді жүретін смартфон деуге болады, оның сенсоры мен бейнекамерасы қоршаған ортаны сканерлеп, 3D картографиялау арқылы құпия дерек жинайды. Топографиялық картаға әскерилер қатты назар аударады.
Еуропада Қытай электрокарлары мен гибридтері көбейіп келеді, осыған байланысты кей мемлекет ішкі қауіпсіздік мәселесіне алаңдап, қорғаныс шараларын қолға ала бастады. Жақында Польша армиясының Бас штабы елдегі әскери нысандар мен оларға жақын автотұрақ аймақтарына Қытайда жасалған көлік құралын кіргізбейтін ресми директива шығарады.
Тыйым BYD, MG, Nio, Xpeng сияқты таза Қытай өнімдеріне ғана емес, бағдарламалық жасақтамасы немесе сенсорлы компоненттері Қытайда жасалған кез келген машинаға қатысты деп жазды Carscoops.
Бұған дейін Ұлыбритания және Еуроодақтағы бірқатар құзырлы орган арнайы қызмет өкілдері мен жоғары лауазымды шенділерге Қытай көлігінде отырып маңызды мәселелерді талқыламауға, мұндай машинаға қызметтік смартфонды жалғамауға кеңес берген. Олар осы арқылы қашықтан тыңдау қаупінен сақтанғысы келеді.
Осыған орай 2025 жылы қыркүйекте Еуропада Data Act (Деректер туралы заң) күшіне енді. Бұл құжат «қосылатын құрылғыларға» қатаң талап қояды. Атап айтқанда, Қытай компаниялары қарт құрлықтағы жүргізушілердің дерегі (маршруты, камераға түскен видео, биометрия) ЕО аумағындағы серверде сақталатынына әрі ҚХР арнайы қызметіне жолданбайтынына кепіл болуы керек.
Комментариев: 0