Полиция заңсыз жанармай саудасына қарсы күресті күшейтті

ҚР Ішкі істер министрлігі хабарлағандай, қазір мемлекеттік шекарадағы 48 автомобиль өткізу бекетінде полицияның 59 посты жұмыс істеп тұр. Олар жанармай өнімдерін заңсыз тасымалдау, соның ішінде жол талғамайтын көліктерді пайдалану арқылы жүзеге асатын әрекеттерді анықтау және жолын кесу мақсатында шара қабылдап жатыр. Шекара маңында орналасқан Жамбыл, Түркістан және Маңғыстау облысы басты назарда. Бұл өңірлерде тәртіп сақшылары заңсыз жанармай тасу әрекетінің алдын алу, көлік құралының құрылымына заңсыз өзгеріс енгізу фактілерін анықтау үшін қосымша шара қолданады.

Полиция автомобильді заңсыз қайта жабдықтайтын немесе қажет тіркеу және рұқсат құжатын алмай-ақ жұмыс істейтін техникалық қызмет көрсету станцияларын анықтайды. Мысалы, Қордай ауданының Қордай ауылында полицейлер мемлекеттік кірістер агенттігімен бірлесіп, машинаға қосымша жанармай багын орнататын 16 станциясыны тексерді. Нәтижесінде алты объектіге қатысты әкімшілік іс қозғады. Кейінгі бір айда шамамен 12 тонна жанар-жағармай материалын заңсыз елден шығармақ болғандардың жолын кесті. Қосымша бензин багы бар 54 автомобильді анықтап, иелерін әкімшілік жауапқа тартты.

Энергетика министрлігі дизель мен бензинді шетелге заңсыз шығару елдегі жанармай тапшылығына әсер етіп отыр деп санайды. 2023 жылы шенділер бұл проблеманы шешу үшін шекарадағы бақылауды күшейтудің орнына жанармай құнын көтеруді жөн көрді. Біраз уақыт мемлекет жанармай бағасын бақылауда ұстап келіп, биыл көктемде бағаны еркіне жіберді.

10 маусымда энергетика министрі Ерлан Ақкенженов елде бензин 3–4 теңге қымбаттағанын айтты. Бірақ ол баға жаз бойы өспейтініне кепілдік бере алмады.

«Бәрі ішкі сұраныс пен ұсынысқа байланысты. Біз нарықты реттемейміз. Егер нарық қатысушылары бағаны 3–4 теңге көтеру әділ деп тапса, солай белгілейді. Нарықтағы баға деген ұғым бар. Қазір мұнай құны шарықтап жатқан жоқ. Баррелі 93.5 доллар деңгейінде тұр. Энергетика министрлігі жағдайды қадағалау үшін қолдан келгеннің бәрін жасайды», — деді министр.