Полиция «сыңары» бар көліктерді ұстап жатыр

Астана тұрғынына ереже бұзғаны туралы хабарлама келе бастаған соң, ол полицейлерге жүгінді. Оның үстіне құзырлы орган айыппұлды баяғыда бөлшектеп сатылған Audi-ге салыпты. Жалған нөмір таққаны көрініп тұр.

Астанадағы Абылай хан даңғылының бойында полицейлер маркасы және түсі бір Audi-дің “сыңарын” ұстады. 28 жастағы ереже бұзушы автомобильді Ресейден әкеліпті, ал нөмірді интернет арқылы сатып алған.

Polisia.kz порталының хабарлауынша жасанды немесе жалған мемлекеттік тіркеу нөмірі бар көлікті басқарған ер адам жауапқа тартылды. Сот оны Әкімшілік кодекстің 590-бабы, 4-бөлігіне сәйкес бір тәулікке қамауға алып, бір жылға жүргізуші куәлігінен айыру туралы шешім қабылдады.