Қараша айының басынан бері полицейлер Ресейде тіркелген көліктерді тексеріп жатыр. ҚР ІІМ мәліметінше елімізде 210 мыңнан аса ресейлік машина бар. Ал РФ ІІМ олардың кем дегенде 80 мыңы Ресейде есептен алынғаны туралы ақпарат берді. Демек мұндай машиналарда жарамды тіркеу туралы куәлік пен мемлекеттік нөмір жоқ.
Қазір «ауадағы» көлік иелері мен шенділер мәселені шешу жолын қарастырып жатыр. Бірақ есептен алынған көліктен де қиын мәселе бар.
Қалған жүз мыңнан астам техниканың арасында «сыңары» бар машиналар да кездеседі, яғни Ресейде дәл сондай нөмір және құжатпен бір немесе бірнеше көлік жүреді. Олардың нақты санын айту қиын, бірақ бар екені рас. Мысалды алыстан іздеудің қажеті жоқ. Алматыдағы тұрақтардың бірінде ақ Toyota Crown седаны (мемлекеттік нөмірі — У 179 МТ 125-аймақ, шанақ — S170) тұрды. Ресейде осыған ұқсас нөмірмен қара Crown (шанақ — S180) тіркелген.
Бұдан бөлек Ресейде сондай Crown Athlete ұсталды. Бірі Алматы көшелерін алаңсыз кезіп жүрсе, сыңары Санкт-Петербургте тұрады екен.
Ұқсас нөмірді екі ғана емес, үш көлік таққан жағдайлар да кездеседі. 2020 жылы тамызда полиция бірнеше Toyota Estima-ны (бәрінің нөмірі — O 298 УН 96-аймақ) ұстады. Екеуі Нұр-Сұлтанда, тағы біреуі Өскеменде жүрген. Ақылы жолдың арқасында құжаты бірдей тағы екі «Эстима» анықталды. Оның біреуі Нұр-Сұлтан — Щучинск тас жолында, екіншісі Алматы — Қорғас тас жолында бір уақытта камераға түсіп қалған.
Бұл белгілі болған бірнешеуі ғана. Қазақстан жолдарында талай «егіздер» жүргені анық. Өйткені мұндай машиналарды елге әкелумен айналысатын ұйымдасқан қылмыстық топтар бар екені анықталды (білместікпен әкелетін саудагерлерді айтпағанда). Осындай топтың бірін полиция 2021 жылы маусымда құрықтады. Көлік контрабандасымен айналысқандар елімізге 1.5 мыңға жуық машина жеткізген.
Ресейде тіркелген көлікті сатып алудың қаупі үлкен екенін тағы да еске саламыз. Алған машинаңыз кез келген сәтте тіркеуден шығарылуы мүмкін. Сол үшін көрші елден көлік аларда арнайы сервистер арқылы техниканы мұқият тексеру керек.
Комментариев: 0