Nissan әйгілі GT-R-ді электр жетекке көшірді

Nissan қаңтарда өтетін Токио автосалонына арналған экспозициясын жариялады. Түрленген азаматтық модельдер мен трек автомобильдерінің арасында ерекше спорткар — Skyline GT-R BNR32 бар, мамандар оны зауытта электр жетекке ауыстырған.

Nissan бір жыл бұрын бастаған экспериментін қаңтарда аяқтайды. Классикалық GT-R энтузиастерінің бірі әрі Nissan инженері өз машинасын донор ретінде пайдаланып, купені электромобильге айналдыруды ұйғарған. Идея қолдау тауып, бастамашы азамат жобаны жүзеге асыратын ниеттес адамдар тобын жинады. Nissan өкілдері электрлі GT-R-ді еріктілер құрастырғанын әрі ол бейресми жоба екенін айтты. Бірақ рестомод зауыттың өндіріс орнында жасалған сияқты.

Фотосуреттен конверсия спорткардың сырт пішініне еш әсер етпегенін көруге болады: тіпті қуаттау порты жанармай багы қақпағының орнына орналасқан. Машинаның техникалық жағына қатысты мәлімет жоқ. Электрлі «Скай» 435 ат күшіне ие Nissan Ariya Nismo моторымен жүреді деген ақпарат бар, бұл автомобильдің алты цилиндрлі стандарт моторынан әлдеқайда қуатты. Инженерлер электромотор жұмысын фирмалық Attesa толық жетек жүйесімен үйлестіру үшін электрониканы басқаруға арналған бағдарламалық жасақтама әзірлейді.

Эксперимент жалғаспайды — Nissan электромодты конвейерге қоюды жоспарлап отырған жоқ. Бірақ R36 индексті жаңа буын «годзилла» электромобиль болуы мүмкін. Өндірушінің мұндай қадам жасауына тек жеңіл және энергия үнемдейтін қатты денелі аккумулятордың жоқтығы кедергі болып тұр.