Жеті ай бұрын Техаста жол апаты болды. Түнгі екілер шамасында сағатына 70 миля жылдамдықпен қозғалған Tesla Model X көпірде тұрған көліктерге соғылады, ішінде бірнеше полиция жасағы болған. Электромобильді тізгіндеген 47 жастағы жүргізуші мейрамханадан ішімдік ұрттап шыққан соң автопилот қосып, ұйықтап қалғанға ұқсайды.
Апаттан бірнеше адам жарақат алды. Арасында сол сәтте ұсталған нашақорды тінтіп жатқан тәртіп сақшылары бар. Олардың бірі шетке ұшып түссе, екіншісін көлік қысып қалған, тағы бір полицей көпірден құлапты.
Енді жарақат алған бес тәртіп сақшысы Tesla компаниясын сотқа берді.
«Көлікте құрылымдық және өндірістік ақау болуы, Tesla-ның бұл кемшіліктер жайлы дер кезінде ескертуге немесе қателігін мойындап, оны түзетуге құлық танытпауы салдарынан, автопилоттың қауіпсіздік жүйесі офицерлер мінген машинаны анықтап, соғылу қаупі барын ескерте алмады, сондықтан жол апатының алдын алу мүмкін болмады», — деп жазылған арызда. Carscoops басылымы сотқа берген тарап 20 млн доллар талап етіп отырғанын хабарлады. Ал оқиғаға тікелей кінәлі адамнан ондай ақша өндіріп алу мүмкін емес сияқты.
Комментариев: 0