Нұр-Сұлтан емес, Астана: жолдағы белгілер ауыса бастады

19 қыркүйекте Қасым-Жомарт Тоқаевтың елорда атауын Нұр-Сұлтаннан Астанаға өзгерту туралы Жарлығы жарияланды. Бұйрық бүгіннен бастап күшіне енді, өзгерісті мемлекеттік орган бөлімшелерінің атауынан ғана емес, жол бойындағы белгілерден де байқауға болады.

«QazAvtoJol ҰК» АҚ хабарлағандай, жұмысшылар республикалық тас жолдар бойындағы жүзге жуық ақпараттық белгіні алып тастады. Жұмыс жалғасып жатыр. Жол жөндеушілер жалпы 467 белгідегі жазуды ауыстырады. Компания бұл жұмысқа қаражат республикалық маңызы бар жолдарды күтіп ұстауға бөлінген ақшадан алынғанын айтты.