Nissan жаңа Primera-ны таныстырды

Манила қаласында өтіп жатқан PIMS (Philippine International Motor Show) көрмесінде бренд бірқатар жаңа моделін көрсетті. Арасында Primera седаны да бар.

Бізге жақсы таныс атауды Nissan мен Dongfeng бірігіп, бастапқыда Қытайға арнап жасаған N7 электромобилі алады. Филиппинде сатылатын көліктегі техникалық шешімдердің көбі қытайларға тиесілі.

Primera-ның оралуы тосын сый болған жоқ. Себебі мамырдың басында Филиппиндегі мемлекеттік органдардың базасынан оған қатысты аз-кем ақпарат табылған.

Nissan N7-нің ұзындығы — 4930 мм, дөңгелек базасы — 2915 мм, демек ол қазіргі Toyota Camry-ден біршама ұзын. Электрокар 218 ат күшіне ие бір қозғалтқышпен жүреді. Агрегат 60 кВт батареядан қуат алады. Машинаның жүріс қоры 500 шақырымға жетеді.

Модель нақты қашан жолға шығатыны белгісіз, марка оның құнын да айтпай отыр. Бірақ төрт есікті көлікті Оңтүстік-Шығыс Азиядағы бірнеше елде саудалайтыны анық.