Nissan шығын рекордтық деңгейге жетті деп мәлімдеді

Nissan 2024 жылды қорытындылап, есеп берді. Компанияның таза шығыны 4.5 млрд долларды құраған, бұл соңғы жиырма жылдағы ең нашар нәтиже екен. Фирма ақшасын барынша үнемдеу, қызметкер саны мен өндіріс көлемін азайту және серіктестерімен қарым-қатынасын жақсарту арқылы қиындықтан құтыламыз деп отыр. Жаңа стратегия RE: Nissan атауын алды.

Бренд операциялық кіріс 90 % кеміп, маржа 4.5-тен 0.6 %-ға түскенін хабарлады. Қызығы сол, компанияның жалпы табысы (85.5 млрд доллар) 2023 жылдан бері онша өзгермеген, кейбір нарықта тіпті саудасы өскен. Компанияның мұнша шығынға батуына көптеп қаражат жұмсауы себеп болыпты.

Компанияның қазіргі басшысы Айвен Эспиносаның есебінше жаңа стратегия келер жылы табыс артуына ықпал етуі керек. Сол үшін компания әр тиынын санап, шамасы жеткенше үнемдейді. Компания 20 мың қызметкерін жұмыстан шығарып, 17 зауытының жетеуін жабады және жаңа кәсіпорын салмайды.

Жаңа модельдер жобалауға кететін шығынды азайтып, платформа санын шектейді. Қосалқы бөлшектер тізімі де 70 % қысқарады. Бренд Renault, Mitsubishi және Honda-мен бірлесіп жаңа өнімдерін тездетіп шығаруды жоспарлап отыр. Тағы бір жайт, компания өкілдері ендігәрі негізгі нарықтардағы клиенттерінің сұранысына ерекше мән беретінін атап өтті.

RE: Nissan стратегиясын таныстыру барысында үш жоба туралы сөз болды. Фирма Nissan және Infiniti маркалы жаңа кроссоверлер жасап жатыр, одан бөлек Nissan Skyline-ның жаңа буынын ұсынуы ықтимал. Әзірше оған қатысты нақты мәлімет жоқ.