Dodge зауыты Charger орнына қытай көліктерін шығарады

Біраз уақыт бұрын Канада билігі Қытай автомобильдерін жеңілдікпен кіргізетіндердің жолын кесіп, қызметін шектеген. Қысқасы, көбірек көлік сатқың келсе, оларды осында құрастыр деген талап қойды. Осыған ұқсас схема қолданатындар аз емес, бұл жергілікті өндірушілерді қолдау үшін қажет.

CNBC хабарлағандай, аспан асты еліне Брамптондағы Dodge зауыты көмектесетін сияқты. Тіпті онда Leapmotor модельдері жасалады деген сыбыс тарады. Себебі жуырда Dodge брендінің негізгі акционері саналатын Stellantis пен Leapmotor келісімшартқа қол қойған.

Мұнда техника құрастыруға ешқандай кедергі жоқ. Кәсіпорын 2023 жылдан бері бос тұр. Сол жылы желтоқсанда Dodge бензинді Charger мен Challenger-ді конвейерден алып тастады. Leapmotor оны қайта жабдықтап, бірнеше моделін құрастыра алады. Тек зауыт толық циклді өндірісті қолға ала ма, әлде қытайлар дайын машина жинақтарын жеткізіп, жинай бере ме деген сұрақ мазалайды. Өйткені екінші әдіс канадалықтарға ұнамайтыны анық.

Оның үстіне, Оттава оңтүстігіндегі көршісінің пікірін ескеруге тиіс. Қытай экспансиясынан сескеніп отырған АҚШ-тың ойын елемеу мүмкін емес, өйткені бұрыннан Канада кәсіпорындары құрастырып жатқан автомобильдердің 85 %-ын Америка тұрғындары алады.