Мопед тізгіндеген курьер бесікарбадағы сәбиді қағып кеткен. Төле би мен Брусиловский көшелерінің қиылысында болған оқиғаның видеосы әлеуметтік желіде тарады. Одан мопед жүргізушісінің жол қиылысынан қызыл шырақ жанған кезде өткенін байқауға болады.
Полицияның хабарлауынша, жол апатынан үш айлық нәресте зардап шекті. Ол ауруханаға жеткізілді. Ал курьер оқиға орнынан қашып кеткен. Бірақ көп ұзамай ұсталып, Алмалы ауданындағы полиция бөлімшесіне жеткізілді. 1983 жылғы қашқынның сөзінше, ол жазадан қорқып, оқиға орнынан табанын жалтыратқан екен.
Қос дөңгелекті көлік мінген азамат Әкімшілік кодекстің кем дегенде екі бабы бойынша жазалануы мүмкін. Атап айтқанда, адам денсаулығына зиян келтіруге алып келген жол ережесін бұзу (610-баптың 2-тармағы) және жол апаты болған жерден кетіп қалу (611-баптың 2-тармағы). Осы баптар бойынша 90 АЕК (262 530 теңге) айыппұл салынады.
Егер нәресте ауыр жарақат алса, онда іс ҚР Қылмыстық кодексінің 345-бабына сәйкес қаралады. Аталған бап бойынша ақшалай айыппұлмен қатар, қоғамдық жұмыстарға тарту, қылмыстың ауырлығына байланысты 40 тәулікке дейін қамауға алу және он жылға дейін бас бостандығынан айыру жазасы қарастырылған.
Айта кетейік, мопед жол қозғалысының толық қатысушысы саналады. Сол үшін жол ережесіне толық бағынуға міндетті. Біз бұған дейін жазған мақаламызда мопед жүргізу ережесін түсіндірген болатынбыз.
Комментариев: 0