Mitsubishi Қытайдан кетті

Mitsubishi ресми түрде Қытайдағы Shenyang Aerospace Mitsubishi Motors Engine Manufacturing (SAME) бірлескен кәсіпорнының құрамынан шығамыз деп мәлімдеді. Осылайша марка Қытайдағы жұмысын толығымен аяқтады, себебі GAC-пен бірлесіп автомобиль шығару 2023 жылы тоқтаған еді.

SAME зауыты қозғалтқыш жасаумен айналысатын. 1997 жылы құрылған кәсіпорын Mitsubishi-ге ғана емес, жергілікті брендтерге де агрегат жеткізіп отырды. Кейбір дерекке сәйкес Mitsubishi серіктестерімен бірге Қытай нарығының 30 %-ын қозғалтқышпен қамтамасыз етті. Қазір дәстүрлі моторға сұраныс күрт төмендеп, жергілікті өндірушілердің позициясы нығайғандықтан, компания SAME акционерлері қатарынан шықты.

Mitsubishi-дің Қытайдан кетуіне ресми себеп — аспан асты еліндегі өндірістің қарқынды өзгеруі. Электромобиль мен гибридке сұраныс артып, халық жергілікті брендтерге бет бұра бастағандықтан, шетелдік маркаларға қызығатындар азайды. Енді Mitsubishi Оңтүстік-Шығыс Азия мен Латын Америкасы секілді басқа өңірлерге назар аударады. Жақында компания осы нарыққа арналған жаңа Destinator кроссоверін көрсетті.

Бәсекенің күшеюі Mitsubishi мен GAC арасындағы бірлескен кәсіпорынның жұмысына нүкте қойды. 2012 жылы құрылған зауыт соңғы жылдары көбінесе Outlander кроссоверін шығарып келген, бірақ 2018 жылдан бастап саудасы біртіндеп төмендей бастады. 2023 жылдың қазанында Mitsubishi Қытайдағы қызметін қайта қарап, автомобиль өндірісін тоқтататынын жариялады. Бірлескен кәсіпорынның активтері GAC меншігіне өтті және Aion маркалы электрокар өндірісін ұлғайту үшін қолданылатын платформалардың біріне айналды.