«Мерседес» АҚШ-та қала ма?

Америка билігі көктемде қытай көліктерінің жолын кесу үшін жаңа заң жобасын әзірлеуге кіріскен. Оған сәйкес құрамындағы қытай капиталы 15 %-дан асатын кез келген компания мұнда қызмет ете алмайды./p>

Салдарынан мұхиттың арғы жағында ондаған жыл бойы қызмет етіп, кәсібін дөңгелетіп отырған Volvo (Geely концернінің меншігінде) мен Aston Martin (17 % акциясы дәл сол Geely-ге тиесілі) секілді брендтерге қауіп төнді. Бұл тізімде Mercedes-Benz те бар еді. Себебі құнды қағаздарының 9.98 %-ын BAIC алса, тағы 9.7 %-ы Geely басшысының қолында./p>

Штутгардта орналасқан концерн кезінде көптеп инвестор тартқан. Олардың қатарында Кувейттің тәуелсіз қоры 5.33 % акция), АҚШ-тың BlackRock Inc (5.93 %), Vanguard Capital Management (3.33 %) компаниялары бар.

Құжат күшіне енсе, Mercedes-Benz аса маңызды нарықтардың бірін тастап кетуге мәжбүр болатыны анық. Бірақ АҚШ сенаты оған жеңілдік жасайтын сияқты. Заң жобасын жасағандардың бірі Берни Морено «Mercedes-Benz автомобильдеріне тыйым салатын ойымыз жоқ» деді.

Марканы жақтаушылардың мұндай шешіміне жергілікті компаниялардың қолындағы акция ықпал етуі ықтимал. BAIC мен Geely-дің үлесі компанияны бақылауға мүмкіндік бермейді және маңызды шешімді тек немістер қабылдайды. Демек, АҚШ-қа аттанатын модельдердің электрондық жүйесінің құпия кодтарын ала алмайды.

Шенділердің марканы қыспаққа алмай, тығырықтан шығатын жол іздеуі бекер емес, Алабамадағы алып зауытта мыңдаған жергілікті тұрғын еңбек етіп жатыр, жүздеген дилерлік орталықты тауарсыз қалдыруға да болмайды.