Mercedes-Benz екі жылда ондаған жаңа модель шығарады

Mercedes-Benz қаржылық есебінде топтаманы жаңартуға қатысты ауқымды жоспарын жариялады. Бұл компания тарихындағы ең ірі жоспар болып есептеледі және әртүрлі нарыққа арналған ондаған жаңа немесе жаңарған модельді қамтиды. Mercedes-Benz автомобильдерін электрлендіру жоспары барын, олардың технологиялық мүмкіндіктерін арттыратынын айтты.

Бренд концепт ретінде бірнеше рет көрсеткен үшінші буындағы CLA седанын жаңа өнім ретінде ұсынады. Ол нарыққа толық электрлі нұсқада және жоғары технологиялық іштен жанатын қозғалтқышпен шығады екен. Бұл күштік құрылымның құрамына жаңа 8 сатылы робот кіреді.

GLC кроссоверінің, С және E класты седандардың батареялы нұсқасы болады. Mercedes-Benz 2027 жылы топтамадағы барлық модельдің 30 пайызын ғана электрокар етуді көздеп отыр. Жаңа өнімдер қатарында AMG машиналары бар, G-класты жол талғамайтын көліктің шағын түрленімі мен ұзын GLE аталды. Соңғысы Қытай халқына таңсық. Аспан асты еліне компания жергілікті мамандардың қатысуымен әзірленген жеті модель ұсынады.

Барлық автомобильге жасанды интеллект элементтері бар, нақты бір нарыққа бейімделетін MB.OS операциялық жүйесін орнатады. 2++ автономдық деңгейіне ие жүргізуші көмекшілері кешенін де жақсартып жатыр. Тағы бір инновация — отынмен және электр күшімен жүретін көліктердің түпнұсқа дизайн стилистикасынан бас тарту. Компания өкілдері клиент алдымен модельді, содан кейін ғана жетек типін таңдайтынын атап өтті.

Іштен жанатын қозғалтқышқа келер болсақ, Mercedes-Benz одан бас тартпайды. Компания болашақтағы экостандарттарға сай келетін 4-8 цилиндрлі моторлар жинағына үміт артады. V12-ні сақтап қалуға да уәде берді, бірақ ол тек таңдаулы нарықтарға шығады. Бренд 2027 жылға қарай өндіріс көлемін 2.5 млн-нан 2 млн машинаға дейін кемітеді, бұл ақша үнемдеуге сеп болады-мыс.