Mercedes-Benz 2025 жылдың қорытындысын жариялады

Былтыр Mercedes-Benz айтарлықтай аз өнім шығарып, табысы былтырғыдан екі есе аз болды. Концерннің қаржылық есебіндегі қорытынды осындай. Таза пайда 2024 жылғы 10.409 млрд еуродан 5.331 млрд еуроға қысқарды. Конвейерден түскен көлік саны 1.983 млн-нан 1.801 млн-ға дейін кеміді.

Қытайда жергілікті автоөнеркәсіптің жетістігі «мерседеске» қызығушылықты бәсеңдетті. 2024 жылмен салыстырғанда сауда 19 % төмендеді. Трамп енгізген тарифтің салдарынан Америкадағы клиенттерінің саны 12 % қысқарды. Бренд үшін ең ірі сыртқы нарық әлі Қытай, былтыр онда 551.9 мың автомобиль өз иесін тапты. Бұл АҚШ-тағы көрсеткіштен (284.6 мың) екі есе көп.

Еуропадағы клиенттер 634.6 мың «мерседес» алыпты. Бұл қарт құрлықта сұранысты тұрақты деңгейде ұстап тұруға мүмкіндік берді. Mercedes-Benz Ресейден ресми түрде кеткеніне қарамастан, балама жолдармен 10.2 мың көлік (2024 жылмен салыстырғанда 30 % көп) кірген.

Былтыр Mercedes-Benz-тің Қазақстандағы саудасы 7.7 % төмендеді. Дилерлер 12 айда 504 машина сатқан, ал 2024 жылы 546 автомобиль өтіп еді.

Сәтсіз шыққан EQS топтамасы сияқты электромобильдер статистикаға қатты әсер етті, бірақ қуатталатын гибридке сұраныс артты. Mercedes-AMG бөлімшесі 7 % өсім көрсетті. G-класс саудасы модельдің 46 жылдық тарихында ең жоғары деңгейге жетті.

Қиындықтарға қарамастан, Mercedes-Benz басшылары 2026 жылға барлық класта 2 млн автомобиль сату, премиум сегментті 15 % ұлғайту және электрлі өнімдер саудасын екі есе арттыру сияқты үлкен мақсат қойып отыр.

Сол себепті марка толықтай жаңа немесе едәуір жаңарған 16–18 модель шығармақшы. Mercedes-AMG мотор гаммасына Eуро-7 стандартына бейімделген алты цилиндрлі қозғалтқыш және V8 қайта оралады. Сонымен қатар Porsche Taycan-ға бәсекелес болатын, жеке платформада жасалған аса қуатты AMG GT XX концептісінің сериялық түрленімі жарық көреді.