Қазіргі таңда Үлкен Алматы айналма автожолының құрылыс жұмыстары үшін жер телімдерін бөлу жөніндегі мәселелердің барлығы шешімін тапты, жер учаскелерінде техника мен қызметкерлер тарту шаралары аяқталып, карьерлер рәсімделді, — деп ҚР үкімет отырысында сөз сөйлеген инвестициялар және даму министрі Жеңіс Қасымбек мәлімдеді. Сонымен қатар, ол ақылы негіздегі жолдың толықтай жасалып, қолданысқа берілу мерзімінің 2021 жылға жоспарланғандығын атап өтті. Осы орайда, Alsim Alarko — McOil — СК — Korean Expressway консорциумының тарапынан құрылысты бекітілген мерзімде аяқтауға қатысты шарттардың барлығы орындалатын болады. Нәтижесінде автожол оңтүстік астананың сыртына тәулігіне 38 мың дана көлік құралын шығаруға мүмкіндік береді, бұл өз кезегінде кептелістердің алдын алып, қала экологиясының жақсаруына оң әсерін тигізеді.
Естеріңізге сала кетейік, Үлкен Алматы айналма жолының құрылысының басталуы жөнінде билік өкілдері ағымдағы жылдың мамыр айында хабарлаған болатын. Бұған дейін құрылысты бастау жұмыстары бірнеше жыл қатарынан кейінге қалдырылып келген еді. Жоба мегаполистің айналасына ұзындығы 66 шақырымды қамтитын алты жолақты қозғалыстағы айналма жол жасауды көздейді.
Салыстыру мақсатында айта кетейік, дәл сондай километражға ие, дәл сол санаттағы, жолақ саны да дәл сондай Алматы — Қапшағай тас жолының құрылысы 2013 жылы басталып, 2016 жылы аяқталған болатын. Үлгерер ме екен?
- 2018 жылдың қарашасында Қазақстанда республикалық маңызға ие үш тас жол бойынша жүру ақылы болмақ.
Комментариев: 0