Land Rover мен Chery әзірлеген Freelander 8-дің интерьері қандай

Jaguar Land Rover (JLR) концерні Қытайдағы бәсекеге қабілеттілігін сақтау үшін батыстағы автоөндірушілердің жолын таңдады. Компания жергілікті серіктестерінің агрегаттарына негізделген жаңа топтамасын әзірлеуге кірісті. Марка Chery және Huawei-мен бірлесіп жасаған алғашқы модельдің Қытайдағы тұсаукесерін 2026 жылдың екінші жартысына жоспарлап отыр.

Жаңа бренд бұрынғы Land Rover кроссоверінің құрметіне Freelander деп аталады және 8 индексін алды. Компания ірі көліктің дизайнын сәуірде көрсетті. Енді автоөндіруші техникалық ерекшеліктерін жариялап, интерьерінің ресми суреттерін ұсынды.

Freelander 8-дің тұсаукесері концерннің Қытайдағы бизнесін қайта құрылымдау кезеңімен тұспа-тұс келді. Дилерлер желісі екі есе азаяды, бірақ шетелден келетін Range Rover, Defender және Discovery модельдерін сата береді. Бұрынғы Evoque-тың орнын жаңа Freelander басады. Соңғы Range Rover Evoque L шілденің басында 180 мың юань (12.4 млн теңге) тұрды. Бұл оның бастапқы бағасынан екі есе арзан.

Техникалық жағынан Freelander 8 — тізбекті гибрид (EREV). 154 ат күшіне ие 1.5 литрлік турбомотор тек аккумуляторды қуаттап, генератор қызметін атқарады. Дөңгелектерді жалпы қуаты 553 ат күшіне тең электрлі агрегаттар айналдырады. Бейімді пневматикалық аспамен жабдықталған шасси толық басқарылатын жүйе алды, артқы дөңгелектері де бұрылады. Huawei әзірлеген i-ATS интеллектуал жүйесі жолсыз жермен жүруге көмектеседі.

60.3 кВт·сағ CATL Freevoy батареясы жолсыз жермен жүруге бейімдеген. Оны 350 кВт токпен жылдам қуаттауға болады. Автомобиль электр қуатымен 220 шақырым (WLTC циклі бойынша) еңсереді. Іштен жанатын қозғалтқышпен жалпы жүріс қоры айтарлықтай артады, бірақ нақты көрсеткіш әзірге белгісіз.

1 / 4

• 
• 
• 
• 

1 / 4

Салонындағы алдыңғы панельде тұнықтығы 8K болатын 46.3 дюймдік ұзын панорамалы дисплей тұр. Ортаңғы консольге 15.6 дюймдік мультимедиа экраны жайғасты. Сәнді әрі ыңғайлы болу үшін дизайнерлер физикалық батырмалардың бетін қымбат сағаттарға тән бұдырлы өрнекпен әрледі, ал ортаңғы тоннельдегі хрусталь тәрізді шайба асыл тас секілді қырлы және 256 түсті жарығы бар.

Freelander 8 алты орынды, бірақ инженерлер жүргізуші мен алдыңғы жолаушының барынша жайлы отыруына басымдық берген. Барлық түрленім жаңа Qualcomm Snapdragon 8397 чипі мен лидары бар Huawei Qiankun ADS 5.0 жүргізуші ассистенттерінің кешенімен жабдықталады.

Freelander биыл саудаға шығады. Бағасы әзірге белгісіз.